1 review for Amalodbhavilo Arjunudu – A Telugu Novel

1. 

   Vijay – March 17, 2026

   అమలోద్భవిలో అర్జునుడు — పుస్తక సమీక్ష

   “అమలోద్భవిలో అర్జునుడు” అనే నవల పేరు చదవగానే మనసులో అనేక సందేహాలు మొలకెత్తాయి. పాండవ మధ్యముడు, కిరీటి అయిన అర్జునుడికి ఈ నవలకు ఉన్న సంబంధం ఏమిటి? ఇందలి అర్జునుడు పాండవ అర్జునుడేనా, వేరే వ్యక్తా? అసలు అమలోద్భవి అంటే ఏమిటి? ఇటువంటి కుతూహలంతో రచయిత ఎవరా అని చూస్తే — విదేశాల్లో సాఫ్ట్వేర్ ఉద్యోగం చేస్తున్న యువకుడు “విజయ్ అప్పల్ల.” నేటి యువత సామాజిక మాధ్యమాల వెంట పరుగులు తీస్తుంటే, ఒక NRI యువకుడు జానపద నవల రాయడం నిజంగా ఆనందం కలిగించే విషయం. “కష్టాలను తట్టుకుని నిలబడిన నా మనోధైర్యానికి ఈ నవల అంకితం” అని రాసిన అంకితవాక్యం రచయిత ఆత్మవిశ్వాసానికి అద్దం పడుతుంది.
   తనికెళ్ళ భరణి, వి.యెన్.ఆదిత్య, ఆరుద్ర ఈశ్వర్ వంటి ప్రముఖుల ముందుమాటలు నవలపై మరింత ఆసక్తిని పెంచాయి. ఇది విజయ్ అప్పల్ల రాసిన నాలుగవ నవల. చిన్న కథలతో కాకుండా, భారీ కాన్వాస్ నవలలతోనే సాహితీ ప్రయాణం మొదలుపెట్టిన ఈ యువరచయిత విజయవంతంగా తన రచనా పయనాన్ని కొనసాగిస్తున్నారు.
   నవల నేపథ్యం పదిహేనవ శతాబ్దం నాటిది. విజయనగర సామ్రాజ్యంతో సన్నిహిత సంబంధాలు కలిగి, తొంభై తొమ్మిది ఏళ్ళు స్వతంత్రంగా పరిపాలించే అనుమతి పొందిన కులశేఖర రాజ్యం నవలా వేదిక. రాజు విజయవర్మకు ఇద్దరు కుమారులు — పరాక్రమవర్మ, విక్రమవర్మ. ఒక శాపం కారణంగా పెద్దకుమారుడు పరాక్రమవర్మ మానసికంగా ఎదగలేక రాజ్యాధికారానికి అనర్హుడవుతాడు. అన్ని విద్యల్లో ఆరితేరిన విక్రమవర్మ రాజుగా పట్టాభిషేకం పొందుతాడు. రాజ్యాధికారం చేపట్టే ముందు విక్రమవర్మ రెండు పున్నముల కాలం యాత్రకు బయలుదేరుతాడు — ఆ యాత్రలో అతను ఎక్కడికి వెళతాడు, ఎవరిని కలుసుకుంటాడు, అమలోద్భవి ఎక్కడ ఉంది, అర్జునుడు ఎవరు అనే రహస్యాలే ఈ నవల గుండెచప్పుడు.
   విక్రమవర్మ రాజ్యపాలన, శత్రురాజ్యాల నుండి ప్రజలకు రక్షణ కల్పించిన తీరు, వదినగారైన రాధాసఖి వల్ల ఎదుర్కొన్న సంక్లిష్ట పరిస్థితులు పాఠకులను కులశేఖర రాజ్యంలో తిప్పినట్లే అనిపిస్తాయి. కులశేఖర రాజ్యంలోని గుప్తనిధిని దక్కించుకోవడానికి ఆఫ్రికా రాణి పన్నిన పథకాలు, విక్రమవర్మతో ఆమె చేసిన యుద్ధం, శివుని అంశతో కూడిన రుద్రకవచాన్ని సాధించిన తీరు — ఇవన్నీ ఉత్కంఠభరితంగా సాగుతాయి. నవల తొలి అంకంలో సృష్టించిన ముడులను చివరి అంకంలో నేర్పుగా విప్పే శైలి రచయిత పక్వతకు నిదర్శనం.
   కొన్ని చోట్ల ఇంకాస్త లోతు ఉంటే మరింత బావుండేది అనిపించింది. విక్రమవర్మ — చందులత దాంపత్య సన్నివేశాల్లో అనురాగం, రసజ్ఞత మరికొంచెం జోడించి ఉంటే బాగుండేది. పన్నెండేళ్ళ తర్వాత చనిపోయాడనుకున్న తన కన్నబిడ్డను కళ్ళారా చూసిన చందులత ఆనందోద్వేగాన్ని మరింత హృద్యంగా చిత్రించి ఉంటే ఆ సన్నివేశం మరింత పరిపుష్టమయ్యేది.
   అయినా నవల ముగింపులో రచయిత అందించిన సందేశం మాత్రం మనసును తాకుతుంది — “కర్మలు ఎవరిని వదలవు. అయితే ధర్మం తప్పక సత్కర్మలు చేసేవారు ఎవరైనా అమలోద్భవిలో అర్జునులే.” నవల పక్కన పెట్టినా పాత్రలు మన మనసులో సజీవంగా తిరుగాడుతూనే ఉంటాయి. ధర్మనిరతి కలవారందరూ అమలోద్భవి వాసులే అని నిరూపించే ఈ నవలను తప్పకుండా చదవండి.
   సమీక్షకులు: రోహిణి వంజారి | 9000594630